TUTAS DAGANG CINDUNG

7. TUTAS DAGANG CINDUNG


Cape!
Cape pisan ningan dagang teh. Barang nepi ka warung nasi sisi jalan, deukeut jambatan patrol, bujur teh satengah dibeubeutkeun dina korsi plastik. Leungeun nyileukeuman meja. Bae ah si udung we anu pesen mah. Cape! kuring mah. Dipikir-pikir, asa can kuat mental, lamun jiga si Udung kitu. Bener, kuring mah salut kana usaha si Udung. Teu ninggali hujan atawa panas, satia manehna mah dagang kana cindung teh. Padahal lamun niggali kana kapayuanna mah, sapoe, untung lamun payu 9 atawa 12 cindung teh. Kituna deui apanan cindungna oge 10rb tilu. Mun payu 9 teh ukur 30rb. Potong ongkos jeung dahar manehna.
Ehm bener, si eta kuat mental. Kuring mah, ukur kitu oge, geus cape, jeung teu pati kuat we ku era, komo jiga tadi mah, si Udung nawar-nawar cindung bari dipake atuh, badis we beben. Gulak-gilek cumentil pisan si Udung, ari keur jualanna the
Cape! bener-bener cape kuring mah.
Heueuh....Pirakadar nutur-nutur si Udung dagang cindung. Kituna deui poe Kemis mah teu ieuh ngider kampung dagangna teh. Ngampar, da puguh poe pasar.
"Bantuan bisi loba langganan poe ieu. Ari libur gawe mah", pokna teh.
Lumayan cenah, enya oge ukur kojengkang. 15 cindung mah payu dua jam nungguan teh. Ti Banjarwangi, Mulyajaya, Sirnajaya, Lebakjaya, Tanjungjaya. Beh dituna Cihurip, Maroko, Naringgul, Batu reok. Sok ngaharajakeun ka pasar Cikajang.
Biasana mah osok ngabrul tateh. Reg mikro, burudul we turun. "Resep Uing mah ka urang dinya teh geus apal deui harga jeung barang. Jadi teu loba ieuh nawar. Teu kudu ableh heula biwir kakara payu", pokna.
"Tinggal asongkeun, pilih-pilih kelir, tanya harga. Bro weh mere duit. Crung creng. Resep Uing mah mun manggihan langganan anu kitu", ceuk si Udung. Bari cacamuilan, neureuy pindang lauk emas.
"Pindang lauk naon ieu teh, Dung. Meni hipu sagala-galana?" tanya teh. Puguh lauk jiga euweuh Cucukan atuh. Bari ku ngenah kieu. Karunya teuing ucing moal kabagean cucuk-cucukna acan. Hampura, wayahna tingalikeun we kuring dahar lauk anu ngeunah kieu. Leup-leup-leup. Teu kudu dibalikeun da puguh kadahar kabeu tuda. set-set-set. dina piring ukur tinggal llab. Asa kurang keneh, nyokot hiji teh. Asa kutap ketap keneh.
"Montong nyokot deui. Bisi balik ngorondang", ceuk si Udung, ngahewag basa kuring rek sapok-pokeun deui pesen ka pelayan.
"Naha dung?", tanya teh rada reuwas. Boa-boa lauk ngenah kieu make anu teu weudeu....ceuk hate miheulaan pangjawab si Udung.
"Harga lauk anu di dahar kudidinya teh, 30rb hiji. Eta teh satengah kilo", ceuk si Udung haharewosan, bari panon culang cileung sieun kadenge ku pelayan atawa anu sarua keur dalahar.
"Euleueuh moal enya teuing, Dung?".
"Sssssstttt.....Tong tarik teuing ngomong teh. Ngerakeun pisan didinya mah. Meni mudo. Matakna gaul atuh jeung restoran".
"Nyaan, Dung didinya ngomong kitu teh? Meureun sakitu mah jueng alas didinya?"
"Alah naha ari didinya, ieu teh pindang naon atuh anu didahar teh?"
"Pindang naon Dung?"
"Pindang Ecot siah. Pindang sajarah kadaharan anu pangeunah-ngeunahna, diantara pasakan lauk. Teu kaasup urang sunda anu gaul, lamun can pernah ngadahar pindang Ecot. Mun teu percaya sok tanyakeun tuh ka Ibu Tia Bratawiria, atawa ka Cc Popon. Manehna mah letahna seukeut. Apanan dunungan didinya? ".
"Kumaha mayarna atuh, Dung?. Kuring mah, ukur boga duit 100rb na saku teh. Eta ge menang nyempilkeun ti pamajikan. Bari can meuli bensin ieu teh".
"Heueuh sok kadituh nyokot deui pindang, ari hayang balik ngorondang, atawa nungtun motor mah", pok si Udung, bari terus we cacamuilan, nambul hulu lauk. Kituna deui bet teu boga pipikiran si eta mah. Apanan Uing mah, tadi oge ukur nganteur manehna. Maturan dumeh nitah dibantuan. Na ari bensin jeung dahar bet kudu kuring anu mayar. Asa kungeunah galeuh si eta ka kuring teh. Bet pinter kodek.
Sajongjongan, kuring mikir, bari dahar ukur nambulan lalab jeung sambel.
"Geus we kieu ayeuna mah Dung", ceuk kuring.
"Meh teu karunya ka didinya, dahar kuring rek dibayar ku kuring. Nu didinya kumaha dinya", dikitukeun teh si Udung rada ngahuleung, nyapek pindangna. Ku sebel tuda bari, si eta nyokot anu panggeudena tea. Boa-boa nyokot anu sakilo si eta teh. Ari kuring ukur diberean anu leutik atuh. Puguh we pang heulana beak. Paingan ngaheumkeun si eta, kuring rek nyokot deui pindang. Paduli ah, paling oge pindang dua 70rb. jeung sangu. Top we nu manehna mah bayar ku sorangan, apanan tadi payu cindung 15 siki. Menang 50rb mah. Dahar 45rb. Gegel tah sendal siah udung, liat sugan karasana. Teu jiga pindang anu hipu.
"Tong kitu atuh, euy, kajeun ieu we, anu uing sapotong ewang ari hayang keneh mah", pokna teh.
"Sangeuk ah......"
*26032010