SARE!

3. SARE!


Jetrek deui. jetrek deui. Acara tipi teh dipindah-pindah wae. Teu kaop aya iklan gancang dipindahkeun.
"Penting. Ngadengekeun informasi. Berita hade", pok si Udung jiga nu heueuh. Si uno apanan ayeuna keur ngobolekerkeun liang tai sorangan", pokna deui. Barina teuing saha anu nanya saha anu ngobrol. Panon mencrong kana tipi sirikna teu ngiceup-ngiceup acan, bari biwir terus ngecom teu reureuh. Unggal berita dikomentaran. Jol iklan gancang jetrek, mindahkeun saluran. Ah, lieur lalajo bareng si Udung mah.
"net-net-net-net"
Hape di udung disada. Gura-giru manehna ngodok pesak, nyokot hape.
"Leuh......ti pamajikan ningan", pokna teh.
"Kang, tong rasa maneh di kota", ku euweuhka era, si udung mah. maca esemes ti pamajikanna ditarikeun.
"Bilih waktu kahihilapkeun. Abdi mah mung ngemutan, ayeuna tos jam 6.30. Sakedap deui isya".
"Adeuh.........ieu pamajikan uing, hade kieu. Romantis eta teh nyai", pokna teh bari menderkeun diukna. Jempolna teu cicing jiga keur neangan hurup rek ngajawab esemes ti pamajikanna tea.
"Enggeus bieu. tong hariwang. Malah jadi imam bieu mah", jawabna teh teu kireum-kireum. Ongkoh ditulis, ongkoh dibaca, bari ditarikeun deuih macana oge. Mun urang, cukup we atuh maca dina hate.
Abong si Udung, dasar si sardung atuh, sakitu kupamajikanna geus di esemes kitu. lain gancang kacai. wudu bari solat. Teu ieu mah. Malah teu euleum-euleum anggur ngabohong. Iraha enggeus solat, komo jadi imam, apanan titatadi oge ukur ngoprek remot tipi.
"Dung dosa euy, enya geus teu solat. Ngabohong deuih", pok teh.
"Aeh........naha didinya can apal carita nabi jeung setan", baku, si eta mah, jiga rek nyalenggorkeun omongan. Meureun sadar manehna oge, lamun kalakuanna jarang akur jeung carita hadena.
"Nya kumaha kitu?", tanya teh rada panasaran.
"Harita basa kangjeng nabi rek angkat solat ka masjid. Barang dugi kana tepas masjid, anjeuna uninga aya setan keur ulal-elol dina panto masjid. Ku kangjeng nabi ditanya. Keur nanon maneh, ulal-elol dina panto?
Harita setan ngajwab, cenah, pokna teh rek ngaganggu jalama anu keur solat.
"Naha teu asup atuh?", tanya kangjeng nabi.
"Sieun kunu sare di juru itu", jawab setan.
"Naha maneh make sieun?"
"Enya oge sare, manehna mah, boga elmu"
"Naha ari kunu solat bet teu sieun?"
"Ukur solat manehna mah. Teu jeung elmuna".
*
"Tah ........., tutas kajadian eta, aya we hadist", ceuk si udung.
"Hadisna naon kitu?" tanya teh.
"Sarena jelema anu boga elmu mah, leuwih alus batan ibadahna jelema anu bodo".
"Naon hubunganna jeung didinya. Apanan didinya mah teu sare", tanya the
"Tong ninggali kana praktek uing atuh, tapi tingali hubungan harti eta hadist".
"Maksudna?"
"Nu boga elmu teh kacida luar biasana. Sarena wae oge jadi ibadah jeung dipikasieun deuih ku setan oge".
"Heuh tapi asa teu nyambung".
"Teu nyambung kumaha, ari didinya"
"Apanan didiya teh titatadi oge teu solat teu sare. malah ukur ngoprek remot".
"Teuing atuh. hayang ngomong kitu we uing mah".
"Gancang kadituh solat", pok teh bari ngajewang remot tipi dina leungeun si Udung.

*
23032010