BEDA SAHURUP KOMO LAMUN DUA

2. BEDA SAHURUP KOMO LAMUN DUA


Puguh ari aya batur mah kitu, aya keur pakukumaha. Beda jeung sorangan. Era nanya, kadituna teh nyasab.... we!
Tapi teu kitu ari si Udung mah. Teu, teu kitu! Kajeun nyasab cenah. Salegana oge Bandung. Mun nyasab, kari ninggali angkot jurusan mana. Rek Cicaheum rek Leuwi Panjang, kabaca, cenah. Pangalaman atuh da si eta mah, kana nyasab teh. Sugan sakali we, teu nyasab lamun di titah nganteurkeun barang ku dununganana. Alesanna teh mending nyasab, jadi tempat anu anyar bakal apal.
Dasar, jelema anu loba ekol. Aya we alesan keur nutupan kateunyahona teh. Embung pisan manehna mah lamun disebut, low intelectual space, si eta mah.
"Omat, matakna lamun geus rek asup ka jalan eta, gancang mengkol. Panjang....., jalan eta mah. nyasabna engke bakal jauh", pokna.
"Rek mengkol ka kenca atawa ka katuhu, brasna pasti ka Ledeng. Peupeujeuh Uing mah. Karunya ka didinya, Mangkaning malangmang mulungmung aya di Bandung. Beda jeung kuring atuh, geus manukna di Bandung mah", eta pokna. Meni tatag lamun geus ngomong teh si eta mah. Asa pang nyahona.
"Manukna, nyasab dung?" tembal teh.
"Kuma dinya, ah. Uing mah ngabejaan enggeus, kadidinya....", pokna deui jiga anu nyungkun.
"Uing mah geus pernah kalangsu", si Udung rada muka carita.
"Nya kumaha kitu dung, pangalaman nyasab didinya teh?"
"Lain nyasab ieu mah", ehm..... na ari si udung. Meni embung we disebut nyasab teh. Narah pisan jigana teh. Kadituna mah nyeta, si eta mah. Embung lamun disebut low intelectual space.
"Haritaa....basa uing balik ti Ledeng. Tunduuuuh pisan! Kamarina tuda, gawe kamalinaan, menang order ngajilid skripsi, bari kudu anggeus sapeuting, atuh. Nepi ka jam opat subuh, gawe teh".
"Terus kumaha?"
"Enya barang turun tina Damri teh, leumpang we ka jalan Sukarno-Hatta. Apanan elf mah ayana dihareupeun terminal Leuwi Panjang, ngincid we kadinya. Lempang teh, teu sirikna bari nundutan. Tapi da sadar ari pipikiran mah.
"KAJANG-KAJANG-KAJANG", Ceuk nu gogorowokan teh. Puguh Uing rek ka Cikajang atuh. alhmdulilah jug nyampak elf, ceuk pikir teh. Ukur di reret we, dina kaca tukangna....., sidik mobil Cikajang. Geus asup mah, neangan korsi pang tukangna. leup we sare uing mah. Tibra. teu apal jalan tol tol acan. Da puguh Uing mah atuh geus apal kumaha ngenahna sare dina mobil. acngkeun tuur kana jok hareup. rangsel dipake anggel dina tuur, leuh.....ngenah. Bari moal mabok ".
"Ari kitu kumaha?". pok teh nyambungan carita si Udung anu norostos.
"Heueuh, teuing geus dimana. teu loba pikir. ngan rada reuwas. Sare teh kahudangkeun kunu gogorowong, KAWALI-KAWALI-KAWALI"
"Naha kawali, dung"
"Uing salah naek mobil. Kuduna naek Cikajang ari ieu malah naek Cikijing. Beda sahurup, A jeung I. 120 km tah Uing nyasab. Komo lamun dua hurup. Kendel jauhna. Gajih sabulan. Meh-mehan beak dipake".
"Naha beak?"
"Nya beak atuh da dipake ongkos balik deui ti Cikijing ka Cikajang".
"lumyan atuh....."
"lain lumayan deui. ngemplad. teu pira gara-gara tunduh. Ngabulasin duit ladang gawe sabulan"
"asli ieu pangalaman teh Dung".
"Shahih uing mah".
"Tapi asa ngadoip, ngobrol teh".
"Teuing atuh. ngan uing mah ngabejan we....beda sahurup oge jauh tah jarakna. 120km. komo lamun dua hurup".
"enya dung.....luhung pangalaman nyasab teh..."
*24032010